Чироқчи тумани "Қизил" ҳудудлар тоифасига киритилганлиги ҳақидаги хабарлар ортидан туман аҳолиси ўртасида ваҳима уйғотмаслик ва карантин қоидаларига қатъий амал қилиш айниқса, бозордаги нарх-навони мутадил сақлаш масаласида туман ҳокими Хуррам Жураев ва сектор раҳбарлари Чироқчи деҳқон озиқ-овқат бозорида бўлишди.
- Туманимизда етарли даражада захира мавжуд, хавотир ёки ваҳимага тушишга ҳеч қандай асос йўқ. Аммо кўпга келган бу балога қарши ҳаммамиз биргаликда, бир ёқадан бош чиқариб ҳаракат қилишимиз лозим, - деди туман ҳокими харидорлар ва сотувчилар билан бўлган суҳбатида.Шундай бўлса-да, бугунги кунда аҳоли ўртасида тасдиқланмаган хабарлар тарқатиб, жамоатчиликда ваҳима ўйғотишга ҳаракат қилинмоқда. Бозорларимизда эса, баъзи бир “олғир” сотувчилар томонидан шундай ташвишли кунларда вазиятдан фойдаланиб, мўмай пул ишлаб топишни мақсад қилган сотувчилар ҳам учраб турибди.
Мана шундай салбий ҳолатларнинг олдини олиш мақсадида масъуллар томонидан туман деҳқон озиқ-овқат бозори сотувчилари билан тушунтириш ишлари мунтазам олиб борилмоқда.
Хусусан, бугун Чироқчи тумани ҳокими Х.Жураев бошчилигидаги туман ишчи гуруҳи деҳқон бозорини кўздан кечиришди. Кўрик давомида сотувчилар билан яқиндан суҳбат ўтказилди.
- Шундай кунларни бошдан кечирган Хитой ва Корея тажрибаси ҳам қатъий интизом ва ўзаро ишонч орқалигина вирусни қисқа муддатларда енгиш мумкинлигини намойиш қилди. Бугун Сизу биздан ҳам вазминлик, бирдамлик, мавжуд ҳолатни реал баҳолай олиш ва мутахассислар тавсиясига қатъий риоя қилиш талаб этилмоқда. Энг асосийси шундай синовли дамларда бир юртнинг – бир осмоннинг фарзанлари эканлигимизни унутмайлик. Ишончим комилки, ушбу синовли дамлар бутун ўзбек халқини янада бирлаштиришга хизмат қилади, - деди туман ҳокими Х.Жураев.
Пандемия вақтида туман ҳокимлиги туман ИИО ФМБ, прокуратура ва туман солиқ инпекцияси билан ҳамкорликда аҳолининг асосий истеъмол маҳсулотлари бўлган гўшт, картошка, сабзи, пиёзнинг туман бозорларида ўз нархида сотилиши бўйича назорат тадбирлари ўтказиб келинмоқда. Нарх-наволар харидорлар талабидан келиб чиқиб шакллантирилмоқда, асоссиз ўсишнинг, сифатсиз ва қалбаки маҳсулотлар сотилишининг олдини олиш чоралари кўриляпти.
