Юртимиз бозорларида озиқ-овқат ва мева сабзавот маҳсулотлари нархи ошиб кетишининг олдини олиш муҳим вазифа саналади. Шу боис, бозорлардаги нарх-наволар тегишли идоралар масъуллари томонидан ўрганилиб келинмоқда.
Бугун вилоят прокурорининг ўринбосари Отабек Қўлдошов Чироқчи туманига ташриф буюрди. Вилоят прокурори ўринбосари О.Қўлдошов туманга уюштирган ташрифи давомида туман прокурори Баҳодир Худойқулов ва Бош прокуратура ҳузуридаги Департаментнинг туман бўлими бошлиғи Баҳриддин Нарзуллаевлар ҳамрохлигида “Чироқчи деҳқон озиқ-овқат бозори” МЧЖ ва савдо комплексларида озиқ-овқат маҳсулотларининг нарх-наволарини ўрганди.
Ўрганишлар жараёнида бозордаги нарх-наво, озиқ-овқат заҳираси ҳамда бозор ҳудудида санитария қоидаларига амал қилиниши ҳолатларига эътибор қаратилди. Вилоят прокурори ўринбосари ташрифи давомида қолипли нон ишлаб чиқарувчи цеҳлар фаолияти билан ҳам яқиндан танишди.
Вилоят прокурори ўринбосари О.Қўлдошовнинг тадбиркорлар билан бўлган суҳбати давомида тадбиркорларнинг мавжуд муаммоларига ечим топиш ва фаолиятини янада ривожлантириш хусусида туман прокурори Баҳодир Худойқулов ва Бош прокуратура ҳузуридаги Департаментнинг туман бўлими бошлиғи Баҳриддин Нарзуллаевларга тегишли кўрсатма ва ўзининг тавсияларини берди.
