Халқимизнинг эзгу қадриятлари кўплаб ўксик қалбларга шодумонлик улашмоқда. Чироқчи туманининг "Ғаллачи" маҳалласига бириктирилган ҳоким ёрдамчиси Самариддин Салаев ташаббуси билан маҳаллада боқувчисини йўқотган оилага хайр-саҳоват маблағлари ва ҳашар йўли билан янги уй қуриб берилмоқда.
Ҳоким ёрдамчисига кўра, маҳаллада ўтказилган хатлов давомида аниқланган, боқувчисини йўқотган оилани ижтимоий-моддий қўллаб-қувватлаш учун хайр-саҳоват маблағлари ва ҳашар йўли орқали уй қуриб бериш фикри пайдо бўлган.Табиийки, мазкур ташаббус маҳаллада яшовчи саҳоватли инсонлар томонидан тўлиқ қўллаб-қувватланди ва барча қулайликларни ўзида мужассам этган уй лойиҳаси тайёрланди. Айни кунларда хайр-саҳоват маблағлари ва ҳашар йўли орқали уй қурилиш ишлари олиб борилмоқда.
– Турмушим ўхшамади 2 нафар норасидам билан ота уйга қайтдик, – дейди Дилноза Ботирова. – Укамнинг уйида яшардик. Қўлимиз “юпқалик” қилиб, алоҳида уй-жой сололмай келаётган эдик. Яратганга шукр, шу манзилдан бизга ҳам уй насиб қилди. Бунинг учун ташаббускорларга, раҳбарларимизга катта раҳмат.
