Зарафшон тоғи тугаган ерда, Чироқчи туманидаги Қуруқсой қишлоғида 10-14 минг йиллик ёки Ўрта Тош Давридан қолган ёдгорликлар мавжуд. Туман ҳокими Хуррам Жураевнинг ташаббуси билан ташкил этилган саёҳатнинг навбатдаги манзилида Олий Мажлис депутати Шарофиддин Назаров ва журналист Бердиёр Жумаевлар тош даври мўжизаларига гувоҳ бўлишди.
Бу обидани маҳаллий аҳоли Сийпантош деб атайди.Қадимий қоятошлардаги қизил рангли расмларда тош давридаги инсонлар ҳаёти ҳамда турмуш тарзи ҳақида муҳим маълумотлар аксланган.
Аммо Сийпантош ўтган аср давомида деярли муҳофаза қилинмаган.Маҳаллий аҳоли бу ерни муқаддас санаб, зиёратгоҳга айлантиргани туфайли омон қолган.
Бундай ёдгорликлар аслида дунёда ноёб.
Франция, Испания ва Ўзбекистон каби бир нечта давлатда учрайди, холос.Ўзбекистонда Қашқадарёдаги айни Сийпантош ёдгорлигидан ташқари Навоий вилоятида Сармишсой ва Сурхондарёда Зараутсой қоятош расмлари ҳам сақланган.
