Ижтимоий тармоқларда Чироқчи тумани Тиббиёт бирлашмаси фаолиятига оид танқидий видеоматериаллар эълон қилинди. Видеоматериалда Тиббиёт бирлашмасининг Қабул ва Хирургия бўлимлари фаолиятига оид санитария ва дори-дармон сақланиши ҳамда беморларга яратилган шарт-шароитлар танқид остига олинган.
Ўрганишлар давомида Қабул бўлими постидаги дори-дармонлар сақланадиган тиббий жавонда ва у ерда сақланаётган дори-дармонларнинг яроқлилик муддати кўздан кечирилди. Аниқланишича, қабул постининг тиббий жавонида Соғлиқни сақлаш вазирлигининг №118-сонли буйруғига асосан 20 даражадан паст ҳароратда 27 турдаги биринчи ёрдам кўрсатиш дорилари ва тиббий буюмлари сақланади.Энди, видеоматериалда кўрсатилган муддати ўтган дори воситаларининг тиббий жавонда пайдо бўлишига эътибор қаратсак. Кундалик дори-дармонлар ва тиббий буюмлар алмашиб турадиган Шошилинч пост тиббий жавонида ҳисобда бўлмаган 2018 йилда ишлаб чиқарилган "сероб" ва "папаверин" дори воситаларининг пайдо бўлиб қолиши ҳақиқатга тўғри келмайди... Видеоматериалда Қабул бўлими катта ҳамшираси Н.Ўринова ҳисобда бўлмаган дори воситаларининг тиббий жавонда турганлигидан ҳайратга тушганлиги ва юқорида номи келтирилган дори воситалари жавонда турмаслигини айтганлиги келтирилган.
Ҳатто, журналист этикасига амал қилмаган ОАВ вакилининг тиббий билим ва кўникмага эга эмаслиги ва Соғлиқни сақлаш вазирлигининг тегишли буйруғидан бехабарлигини тиббий жавонда сақланаётган дори воситалари ва тиббиёт буюмларни сақланиш ҳароратини билмаслигини қандай изоҳлаш мумкин. Қарангки, хона ҳароратини ўлчовчи термометр постга кириш қисмида ўрнатилган ва термометр ОАВ камераси назаридан четда қолган.
Бу майли, Қабул бўлими пости ҳамширалари томонидан постга келган беморлар ҳақидаги маълумотларни қайд қилиб бориш журналини текшириш учун ОАВ вакилида ваколат борми ўзи? Йўқ. Соғлиқни сақлаш вазирлигининг №363-сонли буйруғига асосан "Бирламчи тиббий ҳужжатларни қайд қилиш журнали"ни фақат юқори турувчи соғлиқни сақлаш ташкилотлари ва ҳуқуқ тартибот органларигина текшириш ҳуқуқига эга. Мана сизга, ОАВ вакилининг савияси... Яна бир жиҳатга эътибор қаратсак, ОАВ вакилларининг микрофон ва камера кўтарган ҳолатда беморлар ётган палаталарга шифокор ҳамда ётган беморнинг ўзидан рухсат олмасдан кириб, интервью олиши мумкин эмас. Бу вазият бемор учун салбий таъсир қилиши ва саломатлиги ёмонлашиши мумкин.
Соғлиқни сақлаш вазирлигининг №284-сонли буйруғига асосан тиббиёт ходимларининг тиббиёт муассасаларида кийиниш маданиятига риоя қилиши белгиланган. Видеоматерилда ўрта тиббиёт ходимларининг кийиниш маданиятига риоя қилмаганлиги келтирилган. Ҳолат юзасидан Тиббиёт бирлашмаси бошлиғи Ш.Рўзиқулов томонидан кийиниш маданиятига риоя қилмаган ўрта тиббиёт ходимларига нисбатан қонунчиликда кўрсатилган тартибда интизомий жазо чоралари белгиланди.
Чироқчи тумани Тиббиёт бирлашмаси тасарруфидаги тиббиёт муассасаларида бир ойда тўрт маротаба ҳар ҳафтанинг жума кунлари тозалик ва санитария тадбирлари шунингдек, дезинфекция ва дезинсекция тадбирлари амалга оширилади. Бундан кўринадики, тиббиёт муассасаларида тозалик ва санитария ҳолати доим назоратда.
Тиббиёт бирлашмаси палаталаридаги сантехника жиҳозларининг ишламаслиги юзасидан билдирилган фикр хусусида қўйидагиларни маълум қиламиз. Жорий йилнинг 18 март куни соат 09:00 дан 13:00 гача бўлган вақт оралиғида бирлашма ҳовлисидаги сув насосида юзага келган носозлик сабаб ичимлик суви таъминотида вақтинча узилиш юзага келган ва бу ҳақида тиббиёт бирлашмаси бошлиғи ўринбосари Ф.Ҳайдаров ОАВ вакиллари билан бўлган суҳбатда маълум қилган лекин бу факт видеоматериалда келтирилмаган.
Видеоматериаллардан кўриш мумкинки, ОАВ вакилларининг мақсади Чироқчи тумани Тиббиёт бирлашмаси фаолиятини обрўсизлантириш, Президентимизнинг тиббиётга қаратаётган эътиборини чекка туманларда ижроси таъминланмаётгандек кўрсатиш орқали кенг жамоатчилик эътиборини чалғитиш ва одамлар ўртасида турли эътирозлар юзага келтиришдан бошқа ҳеч нарса эмас.
Агарда мақсад очиқлик ва шаффофлик бўлганда, Тиббиёт бирлашмаси бошлиғи Ш.Рўзиқуловнинг ОАВ вакилларига берган интервьюси ва интервьюда ҳозирги кунда тиббиётда бўлаётган ислоҳотларнинг Чироқчи туманидаги ижроси ва эришилаётган ютуқлари ҳақида берган маълумотлари очиқланар эди. Афсуски, ОАВ вакиллари бу интервьюни кенг жамоатчиликка очиқлашни унамади, балки мақсад бошқадир! Хулоса ўзингиздан...
