Кўкдала қўрғонида бунёд этилган Хотира майдонида ўтганларни хотирлаш, ёши улуғ инсонларни эъзозлаб, ҳурмат бажо келтириш учун мўжазгина боғ яратиш ишлари давом этмоқда.
Бу ерда Мотамсаро она ҳайкали ўрнатилган. Айни кунларда 2-сонли Болалар ўсмирлар спорт мактаби мураббийлар жамоаси мактаб директори Нурулло Тўлаганов бошчилигида турли манзарали дарахт ва анвойи гуллар билан майдон атрофини ободонлаштиришмоқда.
Бундай муқаддас масканларни кўпайтириш, асраб-авайлаш борасида амалга ошираётган ишларимиз аждодларимиз хотирасига чексиз эҳтиромнинг ёрқин ифодасидир, деди Нурулло Тўлаганов. Бугунги тинч, осойишта ҳаётимиз йўлида жонини қурбон қилган ота-боболаримиз билан ғурурланиш, уларнинг муборак номларини доимо ёдда тутиш барчамизнинг фарзандлик бурчимиздир.
