Чироқчи тумани Зарбдор маҳалла фуқаролар йиғини аҳолисининг оқова сувга бўлган эҳтиёжи ўз ечимини топди.
Жойлардаги камчиликлар ва таклифлар, аҳолини ўйлантираётган масалаларини улар билан юзма-юз мулоқотлар жараёнида ҳал этилаётганлиги яхши натижа бераётир.
Халқ депутатлари Чироқчи туман Кенгаши депутати Ғанишер Имомқулов ўзи сайланган ҳудуддаги аҳоли вакиллари билан кундалик ҳаётда учраётган муаммоларни аниқлаш ва бартараф этишга ҳаракат қилмоқда.
Депутатнинг саъй-ҳаракати билан маҳалла аҳолиси ҳамжиҳатликда хонадонларида томорқачиликни ривожлантириши учун маҳалла ҳудудидан оқиб ўтувчи катта анҳор каналигача ҳашар йўли билан ариқ қазишни бошлашди.
– Қишлоғимиздаги томорқалар сувсизликдан ёзнинг иссиқ кунларида қақраб қоларди. Қишлоқ аҳолиси билан ҳашар уюштириб сув йўлини очишни бошладик. Мана қишлоққа оби-ҳаётни олиб келдик. Энди томорқаларда деҳқончилик қилиб рўзғоримизга қўшимча даромад олиб келиш имкониятига эгамиз, -дейди депутат Ғ.Имомқулов.
