Бугун "Bastion" телеграм каналида Чироқчи туманининг "Олмазор" маҳалласи фуқаролари томонидан йўлланган мурожаат эълон қилинди.
Ўзбекистон Республикаси Президентининг 2019 йил 20 февралдаги “Обод қишлоқ дастурини 2019 йилда амалга ошириш бўйича қўшимча чора-тадбирлар тўғрисида” ги ПҚ-4201-сонли карорига асосан Қашқадарё вилояти Чироқчи туманидаги Хумо, Жар ва Олмазор МФЙлари худудида қурилиш, таъмирлаш ва ободонлаштириш ишлари амалга оширилиши белгиланган.
Аниқланишича, мазкур қарорга асосан Чироқчи тумани "Олмазор" маҳалласида маҳалла фуқаролар йиғини маъмурий биноси ҳамда пиёдалар йўлакчаси қурилиши кўзда тутилган.
"Олмазор" маҳалла фуқаролар йиғини маъмурий биносида қурилиш ишлари якунланиб ички фасадини таъмирлаш, электр монтаж ишлари Қашқадарё вилоят “Ягона буюртмачи” ИК томонидан пул маблағлари молиялаштирилмаганлиги сабабли якунига етмасдан келмоқда.
Лойиҳа смета-хужжатларига асосан молиялаштирилган 1,5 км пиёдалар йўлакчасида қурилиш ишлари якунланган ва туман Ободонлаштириш бошқармаси томонидан қабул қилиш далолатномалари расмийлаштирилган.
