Мамлакатимизда аҳолининг бандлигини таъминлашга катта аҳамият қаратилмоқда. Бу борада бир қатор чора-тадбирлар дастурлари ишлаб чиқилган бўлиб, айни кунда мазкур лойиҳалар ўзининг ижобий самарасини бермоқда.
Чироқчи тумани ҳокими Нодир Эркаев дам олиш куни бўлишига қарамай қайноқ иш устида. Туман ҳокими ғалладан бўшаган фермер хўжаликлари ер майдонлари бошига чиқиб, аҳоли билан учрашиб, бандлиги таъминланмаган аҳоли қатламига ғалладан бўшаган ерларга такрорий экин экиб, даромад олишлари учун 20-30 сотихдан ер ажратиб бермоқда. 
Туманнинг "Янгидам" ва "Болсувор" маҳаллаларида фаолият олиб бораётган фермер хўжаликларида ғалладан бўшаган ер майдонлари бугун туман ҳокими Нодир Эркаев бошчилигида аҳолиги тақсимлаб берилди. Афсуски, айрим фермер хўжаликлари раҳбарлари ўз билганича иш тутиб, ижтимоий ҳимояга муҳтож, банд бўлмаган аҳоли вакилларига ғалладан бўшаган ер майдонларини ажратиб беришни пайсалга солиб келаётган эди. Туман ҳокимининг аралашуви билан эса банд бўлмаган аҳоли вакилларига ғалладан бўшаган ер майдонлари ажратиб берилди.
Айни кунларда фуқаролар ўзларига берилган ғалладан бўшаган майдонларда деҳқончилик қилилишни бошлаш арафасида турибди.Ишсиз фуқароларнинг бандлигини таъминлаш, кўмакка муҳтож оилаларни қўллаб-қувватлаш, даромадларини оширишга қаратилган бу каби амалий ишлар уларнинг турмуш даражасини яхшилаш билан бирга, элимиз дастурхонининг тўкин бўлишига хизмат қилиши шубҳасиздир.
