Қашқадарё вилояти Ички ишлар бошқармаси Пост-патрул хизмати ва ЖЦБ Карантин бўлинмаси, вилоят Йўл ҳаракати хавфсизлиги бошқармаси ходимлари томонидан 29 июн куни тунги соат 1.10ларда Чироқчи туман ҳудудида жойлашган «Умакай» мунтазам ЙПХ масканида Қашқадарё-Тошкент йўналишида ҳаракатланиб келаётган «Нексия-1» автомашинасининг салони ва юкхонаси кўздан кечирилганида 35 та қоғоз қутида суяксиз ҳамда очиқ ҳолатда автомашина юкхонасига жойланган суякли гўшт борлиги аниқланди.Бу ҳақда Қашқадарё вилоят Ички ишлар бошқармаси хабар қилди.
Чироқчи туман озиқ-овқат маҳсулотлари хавфсизлиги микробиология ва ветеринария-санитария экспертиза лабораторияси томонидан ҳеч қандай ветеринария маълумотномалари бўлмаган, келиб чиқиши номаълум ушбу гўштдан намуналар олиб текширилди. Туман экспертиза лабораториясининг 30 июн кунги хулосасига асосан жами 800 кг оғирликдаги мол гўшти истеъмолга яроқсиз деб топилиб, тегишлилигича йўқ қилинди.